迪士尼公關 真假炸彈都拆

【明報專訊】香港迪士尼樂園起初有唔少負面新聞，如今形象有改善，迪士尼公共事務副總裁盧炳松（BC）將會喺出年年頭退下火線，佢噚日同記者行家一聚時回看多年來嘅 「拆彈 」經驗，講起迪士尼興建時原來真係有炸彈。


BC話佢翻查過檔案，迪士尼起初要喺大嶼山填海建園，建築公司運送南丫海域嘅海沙之際，竟然將埋喺泥土中嘅炸彈一齊運送，當年迪士尼專程聘請由美國退休軍人組成嘅隊伍搜出炸彈，再由軍火專家引爆，成功 「拆彈 」 。


8號波休館 仍接待內地客

至於任內面對過嘅公關危機，佢最深刻係有一次8號風球要休館，但有2000幾個內地團友未有旅遊巴接送而滯留，若強行送走客人，BC認為會損害樂園形象，決定開放園區畀呢班內地客避雨兼參觀。不過，BC也坦言近幾年見過唔少 「旅霸」，有遊客去完一間餐廳投訴，轉頭又會去另一間，但職員自有一套應對辦法。


BC話退休後會改以顧問方式幫迪士尼策劃大嶼山節項目，佢仲睇好接班人、環境局前政治助理蔡少綿（Linda），相信佢曾經做過傳媒同政府嘅經驗會幫到手。