佔中七一派扇派貼紙

【明報專訊】佔領中環月初搞咗商討日，下周一七一遊行就會把握機會籌錢，佔中發起人朱耀明（朱牧）同Emily講，另一發起人戴耀廷會將《信報》文章結集出書趁七一出售，又整咗一把扇免費派發，列出商討日七大議題，而唔少得就梗係寫明銀行戶口號碼，希望當日拋磚引玉籌款。


戴耀廷文章出書

反佔中嘅「沉默之聲」早排作咗首歌《愛中環》，Emily噚日喺網上見到有首歌《全民佔中》，朱牧話佢哋一早就諗住整首主題曲同logo，但《全民佔中》唔係佢哋首主題曲，佢哋仲搵緊心儀作曲填詞人寫。朱牧又話，漫畫家黃照達為佢哋設計咗logo，會製成貼紙七一派發。


Emily八到logo中間個圓形係個O字，代表occupy，寓意佔領大家嘅心，O上面嘅白鴿代表和平。另外一張貼紙寓意都幾明顯，貼紙背景係國金、中銀、匯豐等大廈，有隻鴿加個心形，擺到明就係sell和平佔中。