發展商：囍歡里未定案

【明報專訊】市建局同發展商將重建咗嘅灣仔利東街改名做「囍歡里」，囍帖街不再，引嚟極大迴響，唔少網民批評個名庸俗，破壞社區回憶。噚日Emily行經囍歡里地盤，見到其中一塊地盤招牌被遮住咗，有網民亦即刻喺facebook上載相片，話連「囍歡里」都「無名見人」，唔通發展商決定從善如流，改番原名？


網民以為招牌被遮

Emily向發展商合和同信和查詢，發言人回覆話，嗰個地盤位置嘅招牌由於做緊工程，一路都無印有「囍歡里」個名，而成個地盤只係得面向合和中心嗰邊地盤係有印上囍歡里，所以唔係因為打算改名先遮住個招牌。咁又真，Emily見到面向合和中心地盤塊招牌，仍然印上囍歡里嘅名。


發言人話商場要到2015年先開張，家仲有好長時間，明白社會對呢個項目有強烈本土情懷，發展商廣納唔同意見，並且慎重考慮，仲話未有最終定案。咁講法，似乎有機會未來個項目唔叫囍歡里喎！