海洋公園水戰 專人搞清潔

【明報專訊】夏日炎炎，又有海洋公園夏水禮喇。今年大家唔使再喺太陽下追逐玩水戰，事關佢哋搞咗一個面積1萬方呎、充滿科幻感嘅室內玩水熒光派對，入面有激光迷陣同熒光都市，有失驚無神會噴發嘅巨形水柱同熒光泡泡，隨時隨地都會有人彈出嚟向你射水，務求入場者盡興。


夏水禮唔少得8米高嘅滑水梯，同埋亞洲首次引入可以4人對戰嘅「勁爆水彈陣」，等你可以同老友一齊走過「槍『淋』彈雨」嘅夏日。除咗有得玩，喺「冰極天地」仲有世界級嘅「wall dance」 表演， 舞蹈員會喺90度垂直舞台表演懸浮空中舞。


至於今年嘅日場門票照舊都係成人280蚊、細路就140。由7月20號到8月25號期間，逢六日晚仲有消暑夜場，由下午5點到10點，成人票價160蚊、小童80。發言人話唔會同迪士尼樂園比較入場人數，不過就希望今年夏水禮入場人數會比上年升5％。發言人仲話，如果有遊客做出唔合衛生嘅行為，會有專人standby清理，所以大家唔使擔心。