「國際太太」七一深水埗派飯

【明報專訊】不同團體都趁七一回歸16年分別舉辦遊行或慶祝活動，一個名為「國際太太」嘅選美組織當日就打算去到香港最窮地區之一深水埗派飯，國際太太亞洲組委會執行主席芳藝芸噚日喺facebook透露，佢哋當日傍晚5點至8點，會去到通州街、南昌街交界嘅玉器市場門口載歌載舞。


芳藝芸話，佢哋當日邀請咗由美國嚟嘅新星樂隊，同佢哋國際太太團一行60人喺深水埗載歌載舞，表演畀露宿者同街坊欣賞，希望突顯愛心同親切感，到時亦會派發600至700個飯盒，希望令露宿者、獨居者、新移民等唔會感到被遺棄，佢仲呼籲大家一齊支持，可以捐食物、物資或做義工。


呢班太太幫弱勢，但有網民似乎唔多欣賞，有人呼籲佢哋唔好做「一次性愛心」，應該落多啲區，最好日日都做，咁先顯得佢哋真係想幫人；亦有人叫呢班太太與其派飯，不如佢哋嘅老公唔好喺市場賺到盡、唔好炒高樓市，咁樣仲實際。