CY自爆倫敦被抄牌

【明報專訊】特首梁振英（CY）前日出席演藝學院畢業禮遇上學生示威，噚日佢又再深入「虎穴」，同一眾高官出席立法會午宴。佢喺席間同議員講起街道閉路電視問題時，大爆自己喺英國疑似違規泊車嘅事件。


唔服氣越洋上訴

話說CY當時喺倫敦，泊咗架車喺兩架車中間，已入咪表，仲將單據放喺車頭，不過仍然被抄牌。CY唔服氣，返到香港後去信倫敦，話自己冇違規，但當局就叫CY自己上網，睇番當日街頭嘅閉路電視影片，就會證明到嗰個位唔泊得車。CY就以此力證英國都有唔少閉路電視。


另外，平日示威當食飯嘅社民連「長毛」梁國雄同人民力量陳偉業，午宴開始就即刻「招呼」CY，舉起示威牌走近佢，但無論佢哋嗌「我要雙普選」嗌得幾大聲，CY都只係一直咁笑。


飯局遇示威 好似「乜都睇唔到」

至於整道具出位嘅新民主同盟范國威，就整咗一大幅海報，話支持環保就要由源頭減廢開始，要求CY下台，諷刺佢係垃圾。可惜CY雙眼只係正望前方，即使放到佢眼前都一副「乜都睇唔到」嘅姿態，繼續展露佢嘅招牌笑容。


泛民去示威，唐營亦似乎唔係好畀面CY。工業界林大輝就話，一早定咗同朋友食飯，唔得閒出席；至於自由黨黨魁田北俊仲好玩，Emily問佢點解缺席午宴，佢一臉漠然咁話﹕「吓？食飯咩？唔知喎！」