中電邀環團推慳電教育

【明報專訊】政府與兩電就《管制計劃協議》做緊中期檢討，係環境局今年下半年嘅重點工作之一，電力市場有無得開放、電費係咪要年年加，就要睇環境局長黃錦星夠唔夠牙力同兩電討價還價。


Emily收到風，政府同港燈最近開咗第一次會，中電趁呢個時候，噚日舉辦「節能工作坊」，邀請八大環團代表出席，力邀環團攜手推動「全民慳電公眾教育活動」。


綠色和平批對提升節能目標無回應

個會開咗成兩個幾鐘頭，會後綠色和平資深項目主任古偉牧話，中電用咗一半時間講現有節能工作，無乜新意，對於環團要求提升節能目標、即每年慳1％電力完全無回應，佢哋覺得好失望。


據Emily所知，中電企業發展總裁莊偉茵噚日親率多個高層開會，但會後就由公共事務部副總監招呼傳媒，話慳電要全民參與先至有效，但又唔肯回應環團要求，又話唔可以「片面地」睇數字而唔理其他用電因素例如天氣、經濟狀况、人口增長等，綠色和平就批評中電借環團過穚。