中投話事人 傳敲定丁學東

【明報專訊】中國嘅主權基金——中國投資有限責任公司，自從前董事長樓繼偉今年初轉任財政部長後，佢個位懸空咗成3個月都搵唔到人接替。不過眾裏尋他千百度，「揸fit人」終於搵到喇，有外電報道，人選已敲定為國務院副秘書長丁學東。


現年53歲嘅丁學東，之前亦擔任過財政部副部長，《華爾街日報》噚日引述消息人士話，佢嘅任命呢幾日就會正式對外公布，不過因為內地政治體制唔透明，未到最後一刻，各類人事變動都無定論咁話。之前市場亦傳過，中證監前主席、現任山東省長郭樹清，亦曾經係「阿爺」嘅考慮人選，不過郭樹清當時以上任中證監新職嘅時間太短為由拒絕咗。


全球第5大主權基金 戰績麻麻

中投公司響2007年創辦，主要職責係為中國龐大嘅外匯儲備「增值」，舊年為止佢管理嘅資產已接近5000億美元（約3.9萬億港元），係全球第5大主權基金。不過佢嘅戰績就麻麻地喇，之前用差唔多234億同140億元入股黑石集團同摩根士丹利，一路都蝕錢。唔知丁總接手後，會唔會有機會「食糊」？