陳太：林鄭無同我訴苦

【明報專訊】前政務司長陳方安生早幾日為政務司長林鄭月娥抱不平，話特首梁振英唔重用佢，之不過陳太撐林鄭，唔知會唔會影響林鄭仕途。噚日去七一遊行嘅陳太就澄清，話林鄭冇同佢訴過苦，亦無意勸林鄭辭職，因為特首同梁班子已經失信於民，一個民望最高嘅司長辭職係非常不智。


無意勸林鄭辭職

講起林鄭月娥，做過前政務司長林瑞麟同林鄭新聞秘書嘅政務官羅莘桉，今日就履新新崗位，做觀塘民政事務專員。「起動九龍東」係林鄭主催嘅計劃，羅莘桉做呢個位應該大有作為。


林鄭前秘書履新民政專員

唔少政務官上位前都會做民政事務專員，係一個重要嘅地區歷練，因為要應付唔同地區人士嘅利益關係，要好高政治同溝通技巧。羅莘桉1997年加入政務職系，差唔多係最後一期長俸制嘅政務官，佢做過前工務局、民政事務總署、前房屋及規劃地政局、食環署、駐東京經濟貿易辦事處同民政事務局等，佢同Emily講過自己特別享受做文化方面嘅工作。