煲呔不在港 回歸不見影

【明報專訊】前日七一回歸升旗禮同慶祝酒會，前特首曾蔭權冇現身，唔少人都關心佢做乜咁唔畀面，前任行政長官高級私人助理回覆傳媒時就話，煲呔喺上個月下旬已經離開咗香港，家身在外地。高級私人助理又話，煲呔離開香港前，已經通知咗民政事務總署，為自己未能出席致歉。


煲呔自從舊年7月落任後，非常低調，近期唯一出席過嘅公開政治場合，就係今年6月24日廣西嚟香港招商，拉大隊嘅廣西自治區書記，正係中聯辦前主任彭清華，於是煲呔同埋董建華、梁振英都出席主禮。