少林弟子截拳道高手

【明報專訊】今年昂坪360喺暑假舉辦咗「武林盛匯360」，同過去幾年一樣，佢哋邀請咗少林功夫大師上山表演，而今年正值功夫巨星李小龍逝世40周年，所以「武林盛匯」嘅活動會加入截拳道元素。


李小龍逝世40年 博士講解截拳道

昂坪方面喺市集安排少林弟子同截拳道高手過招，呢班高手更會即場教功夫，遊客唔單止可以即場學習，仲可以同佢哋合照。昂坪本月13日仲安排咗「李小龍與振藩截拳道」嘅講座，由香港振藩截拳道總會會長陸地博士主講，佢主要會講吓截拳道嘅哲理、動作特色同科學理論。


另外，昂坪360董事總經理邵信明就話，今年無計劃加價；而上半年接待嘅遊客人數同舊年差唔多，當中非本地客人就有雙位數升幅，但佢希望可以有多啲本地客去昂坪喎。至於之前有纜車疑似有鏽漬事件，佢就澄清嗰啲只係纜索嘅潤滑油，纜車好安全。