「無黨派」舉報佔中

【明報專訊】「佔領中環」運動醞釀咗好幾個月，但真正佔中係出年嘅事，不過已有反對佔中嘅市民不滿，噚日去咗警察總部報案，話佔中發起人教唆他人犯法，報案人黃引祥聲稱自己係無黨派，只係普通市民。不過翻查資料，原來佢係新界社團聯會理事，亦係齊心行動副召集人，被人踢爆後，佢先承認曾經組織愛港力，但後來退出咗。


支持者：唔想做丁子霖

一人報案、數人聲援，噚日有幾個聲稱唔認識黃引祥嘅市民，自備橫額去咗警察總部外支持，佢哋不約而同話大家本來唔相識，但都喺一啲「正能量」活動，好似喺愛港之聲搞嘅活動上見過面，所以認得。咁點知黃引祥報警呢？佢哋話睇電視、聽電台節目得知㗎喎。


其中一個支持者李女士講到佔中就好嬲，佢話自己有3個仔女，佢都叫佢哋唔好參與佔中，因為事件只會變成「六四」翻版，仲話「我唔想做（天安門母親）丁子霖！」問到佢係咪擔心警方出坦克鎮壓佔中者，佢立即話「唔係」，但強調佔中唔會和平咁話。


黃引祥話贊成普選

黃引祥話，佢報案係因為曾經喺論壇上問過佔中發起人之一戴耀廷，對方都確保唔到佔中會和平喎，佢話自己都贊成有真普選，但覺得矛頭唔應該係北京而係立法會，仲話「應該圍立法會」，但後來又話，無論佔領邊度都係唔理性。