民陣籌52萬近年新高

【明報專訊】七一遊行多個政黨團體都算豐收，籌款數字比過去多。佔領中環行動最勁，籌到成80萬；學民思潮都有72萬；至於每年做搞手、算係遊行幕後功臣嘅民陣，今年成績都好好，籌得52萬。召集人孔令瑜話呢個數字係近年新高，但佢哋暫時未計到今年遊行同夜晚嘅集會總開支幾多，未知最終可以捐到幾多畀佔中秘書處。


人力無毓民 籌款勁跌

立法會議員黃毓民早前退出人民力量，今年人力籌款勁跌至32萬，一直係吸金王之一嘅黃毓民今年遊行就為普羅政治學苑企街站，售賣佢嘅著作，不過普羅籌到幾多錢，毓民噚日唔肯講，叫大家唔好追問，但坦言佢本書滯銷，皆因遊行當日落大雨，佢話當日拎咗1000本出嚟賣，落雨已經令佢損失咗100本喇。另外，毓民話佢今年會出本《我在法庭的自辯》，講番佢前年七一非法集結官司。


葉劉會出兩本書

另一邊廂，新民黨主席葉劉淑儀會出兩本書，《家．國．情》會結集《明報》專欄文章，而Learning English with Regina Part III亦係結集報章專欄文章，順便教人英文。葉太話今年暑假會留喺香港教英文，等9月無咁熱先去歐洲玩喎。