大Sir自稱過氣老倌

【明報專訊】80年代香港面對前途問題，前新華社香港分社喺1983年組織咗個「青年才俊團」訪問北京。呢班團友左中右政治立場都有，30年後敘舊，佢哋噚晚就去咗跑馬地馬會會所飯敘。


Emily見到好耐冇露面、非團友嘅行政會議前召集人鍾士元（大Sir），當然把握機會問佢對時局嘅意見，但大Sir問極都唔多肯評論時政，仲成日話自己係「過氣老倌」，又硬銷自己嗰本回憶錄，話Emily想知嘅嘢都喺晒本書度。


對梁班子有睇法 但唔講得

大Sir只肯話，環顧全球，真普選都未必搞得掂社會所有問題。至於係咪要改革目前嘅行會，佢話個個特首都有自己心水，家環境同當年行政局年代唔同。大Sir講到明對梁班子一定有睇法，不過就唔講得，有貼士畀特首梁振英都唔會公開講。


大Sir精神唔錯，但頭頂就貼住塊膠布，佢指指頭頂，話係早排唔小心撞親。


李國能：司法獨立維持得唔錯

至於當年團友終審法院前首席法官李國能，就話香港法治尤其司法獨立，仲係維持得唔錯，但對於普選同七一遊行，佢就同大Sir口徑一致，唔評論政治嘢，只強調政制演變要商討，而普選定義就要摸索咁話。