曾憲梓唱紅歌 張曉明跟住唱

【明報專訊】香港客屬總會噚日喺大埔林村舉行美食嘉年華，簡單一個地區活動，都請到特首梁振英（CY）、中聯辦主任張曉明等人出席，但天公不作美，活動開始前遇上黃色暴雨，主辦單位唔知係咪有取消活動嘅最壞打算，於是就通知特首辦，叫梁振英唔使去喇，但活動最後亦如期舉行，張曉明等其他嘉賓都有到場，獨欠CY。


客總遇黃雨 叫CY咪嚟

梁振英缺席，在場主禮一樣咁開心，即使佢哋面對記者後排嘅一堆空枱，亦無阻佢哋慷慨激昂咁發言，好似客屬總會主席梁亮勝就大罵佔領中環、拉布都係亂中亂港，所作所為妨礙香港發展。榮譽主席曾憲梓更加用唔係好易聽得明嘅普通話，表明客家人反對佔中，批評係破壞香港穩定。


正當大家唔係好聽得明曾憲梓講咩時，佢就突然高唱《沒有共產黨就沒有新中國》，全場嘉賓亦好識做，立即拍手幫佢打拍子，張曉明更加喺個位度口噏噏咁跟住一齊唱。


雖然落住大雨，但無阻嘉賓試食客家菜，好似客家燜豬肉、黃酒雞等，張曉明等人起勢咁食，仲同主持人講樣樣都非常好食，至於鄉議局主席劉皇發就最鍾意食釀涼瓜。飲飽食醉之後，張曉明、發叔離開嘅時候都唔肯同記者講番幾句。