新創建員工親子樂 請睇戲遊迪士尼

【明報專訊】暑假到臨，成班小朋友放晒假，相信阿爸阿媽都煩緊有咩親子活動。新創建（0659）近排就搞搞新意思，將舉辦首次員工Movie Day，嚟緊星期日（14號）包場請晒總公司員工嘅一家大細，齊齊去睇迪士尼卡通片《怪獸大學》，跟住9月份仲會請埋去迪士尼玩足一日。除咗定期有嘢玩，新創建仲一早推行男士侍產假，男同事有足足3日假可以陪老婆，都算係華資公司中嘅先鋒，認真唔話得。


據新創建公關話，花盡心思搞咁多活動，都係提倡Work Life Balance，希望減低員工嘅流失率，仲話舊年員工流失率得8%，遠遠低過市場平均水平17%（香港人力資源學會數字），反映關顧員工嘅措施真係使得。