ICON酒店 明日客房

【明報專訊】Emily成日都覺得酒店房嘅設備不過係大同小異，但噚日睇咗3間「屬於未來」嘅「明日客房」，入到房，會見到一個可以打電話同接收多媒體嘅電視，可以坐喺牀度用電視遙控call老友，叫佢幫手搵地圖再直接喺上面畫埋路線出嚟。而房嘅冷氣亦可以遠距離調校，Emily未返到酒店前，就可以用手機App校好房間冷氣，一入房即可以透心涼。


電視call老友 即時畫地圖

房間另一特別之處，係個個雪櫃都有感應器，Emily攞咗乜嘢出嚟、攞咗幾耐都一一記錄，真係有時想飲住酒店嘅汽水、之後幫佢買番以豁免收費都唔得。


係咪真係「新技術」、「高科技」嘅未來產品，Emily唔係專業人士，真係唔太清楚，但市面上好似都有幾多類似功能嘅產品。不過就方便而言，3間「明日客房」又確係攞滿分，至少Emily都搵唔到有咩要落牀先做到。


3間客房位於理大唯港薈（Hotel ICON），今次會做6個月測試，房價同普通房一樣每晚2400蚊起。不過大學方面想順便做埋研究，所以會喺多個房內裝置安裝感應器，想住嘅要先聯絡理大丁碧晞博士，聽完講解先訂得房。