美銀美林：東南亞企業最睇好

【明報專訊】雖然近排亞洲係咁走資，經濟又有放緩迹象，但亞洲嘅企業原來對盈利前景都幾樂觀。美銀美林4月中至5月底訪問咗超過600間亞太區公司嘅財務總監（CFO），當中有成62%嘅受訪者認為，今年錄得嘅盈利將會超過舊年。


按地域比較，東南亞企業嘅信心尤其高，有72% CFO認為今年盈利會好過去年，當中以印尼最樂觀（見圖）。中國亦排到前5名，比例達到66%，比舊年唔到五成提高一大截。


相比之下，成熟市場就「驚青」啲喇。亞洲四小龍排晒喺尾，新加坡同香港個比例都係六成幾，至於日本同韓國（南韓）就更低，只有約五成。


「日驚韓顫」 成亞洲最悲觀

最多受訪者認為，會透過提高營業效益去改善盈利，其次就係提高對營運資本嘅管理。至於裁員……好彩只有3%受訪CFO會咁做，打工仔可以舒一口氣。


另外，調查又發現，正在快速成長嘅東南亞企業，投資嘅意向都積極啲。表示會比舊年增加資本開支嘅受訪CFO整體為46%，當中菲律賓、印度同泰國最積極，個比例接近六成，相反日本、台灣、韓國呢啲成熟市場全部都喺四成以下。


菲印泰投資積極 六成增開支

雖然呢個調查反映出亞太地區對盈利前景態度正面，但美國部署退市、亞洲大走資呢啲事件都係集中響近月發生，個調查係5月底進行，個研究結果話唔定都會有啲「時差」。


email: [email protected]