樂樂盈盈浪費春宵

【明報專訊】7歲嘅大熊貓盈盈、樂樂，嚟咗香港5年幾都生唔到BB，海洋公園早幾日趁佢哋發情期，關閉熊貓館畀機會佢哋交配，可惜無論樂樂幾主動爬到盈盈身上，最終都係交白卷。海洋公園家試吓幫佢哋人工受孕，睇下做唔做得出成績。


採新鮮精液人工受孕

臥龍中國保護大熊貓研究中心獸醫主管王承東獸醫話，盈盈樂樂健康非常好，但可能唔夠經驗，先至會交配失敗。不過，工作人員已經喺樂樂身上拎咗新鮮精液，幫盈盈人工受孕，而且非常順利。佢話新鮮精液質素比以往用嘅冷凍精液高，相信容易啲成功懷孕。


海洋公園話，如果盈盈成功受孕，最快會喺10月至11月出現懷孕迹象，包括荷爾蒙水平會轉變同食少啲嘢。Emily希望盈盈樂樂快啲可以有愛情結晶品啦！熊貓館噚日起重新開放畀市民參觀。