何俊仁女兒「便當工房」結業

【明報專訊】喺金鐘返工嘅人，中午食飯都幾頭痕，選擇唔多價錢亦偏貴。喺金鐘遠東金融中心地下嘅「便當工房」，就成為其中一個受打工仔歡迎嘅食店，原來呢間係民主黨何俊仁個女同女婿開嘅，不過Emily要同大家講個壞消息，便當工房做埋今日就會結業喇。


便當工房早前向佢哋嘅會員發電郵，感謝顧客過去兩年支持，但因為租金、食物成本等上漲，佢哋無辦法唔結業。Emily問過何俊仁，佢話據佢所知，其實便當工房都有好多人幫襯，不過最大問題係佢哋只做外賣，完全不設堂食，所以根本「好生意都做唔切」，規模唔夠大，令佢哋都招呼唔到咁多人，如果有得堂食就好啲。至於係咪損手離場，佢就話相信舖頭唔會蝕好多。


仁哥話其實佢女婿以前做金融好叻，今次係首次創業，汲取經驗後會否東山再起佢就唔清楚，但透露佢個女呢幾個月都已經無落舖頭，因為最近做咗媽媽，要專心湊仔呀。