打風停航 靠睇巴士面色

【明報專訊】相信唔少人嘅手提電話都下載咗天文台個App，隨時隨地掌握最新天氣資訊，有無諗過，上世紀50年代嘅香港打風，政府用乜嘢方法通知街上市民，尤其係住離島嘅市民，提醒佢哋趕搭渡輪？天文台長岑智明同Emily講，佢喺收藏家嘅收藏品中搵到答案，原來當時嘅巴士同電車都要負起通知市民嘅責任，利用車身顯示地點嘅捲軸，顯示紅色或藍色，代表渡輪服務隨時停航（Ferries May Stop）或已經停航（Ferries Have Stopped），颱風襲港時，碼頭亦會懸掛呢兩種顏色嘅旗幟，提醒市民最新情况。


天文台開台130年，有唔少有趣嘅歷史故事有待發掘，現任台長岑智明同埋同事，就聯絡本地收藏家甚至喺外國網站親自尋寶，結果畀佢解開唔少謎團。昔日交通工具協助公布渡輪服務信息只係發現之一，而呢個故事仲啟發咗台長，與九巴商討喺小欖轉乘站嘅「巴士到站預報屏幕」，顯示最新風暴資訊，計劃有待落實。


剪報見證11月打10號波

聽日開幕嘅書展，天文台會推出紀念成立130周年嘅新書《有緣相聚》，當中有唔少珍貴歷史圖片，亦有唔少台長親自發掘嘅資料，其中一份英國報章，記載咗香港1900年，即目前唯一一次11月打10號風球嘅事件，報章背後刊登咗八國聯軍進攻北京嘅情况，雖然未能放入書中，但市民都可以到香港歷史博物館正在舉行嘅展覽，睇到呢份剪報，展覽期至9月2日。