耀才開聲撐證監 叫業界「要反省」

【明報專訊】耀才證券（1428）一向係監管機構嘅忠實粉絲，之前港交所延長交易時段，又推期指夜市，搞到滿城風雨，耀才都係第一個舉腳贊成。今次一班C組經紀行反對證監會修訂專業投資者制度，但早已晉身B組嘅耀才噚日高調話支持證監，今日下午嘅立法會恐怕又有好戲連場。


支持修訂「專業投資者」定義

由於家對「專業投資者」嘅定義，只係睇佢哋有幾多資產，事實係錢多唔一定專業，如果唔係點會有咁多雷曼事主。證監會就想修訂文件，希望個人專業投資者同一般散戶得到同樣保障。但一班細經紀行反對，覺得會增加經紀行被客戶索償嘅風險。


一班華資經紀行會喺今日上立法會同證監會開會，耀才噚晚就發聲明話，證監嘅建議係為咗保障投資者，希望業界放低成見，仲叫大家「好好反省，不為反對而反對」。嘩！講到咁盡，因住又成為眾矢之的呀。