A貨梵高畫 盛惠25萬

【明報專訊】海港城話搞梵高展，噚日Emily自然好開心去睇啦，點知去到之後發現冇真迹喎，5個展品都係打印出嚟嘅，仲要每幅叫價25萬元，香港限量100幅。不過，噚日出席開幕禮嘅梵高曾侄孫、阿姆斯特丹梵高博物館董事會顧問Vincent Willem van Gogh就話，呢批畫作同原著毫無差別，就連材質、筆觸紋理同顏料色塊都同原著一模一樣，至於係真唔係真，大家就要金睛火眼睇真啲嘞。


3D打印 梵高曾侄孫： 同原著無分別

今次展出嘅5幅作品包括《向日葵》、《雷雨雲下的麥田》、《盛開的杏樹》、《豐收》同《克里希的大道》，每款限量20幅，每幅盛惠25萬元。呢啲還原作品係用3D技術掃描再打印出嚟嘅，據稱阿姆斯特丹梵高博物館同富士攝影器材有限公司用咗7年時間先至研發到呢個技術。梵高博物館發言人話，團隊要用3個月才可以製造一幅作品，為咗確保每幅畫都同原著完全一樣，要不斷檢查，有少少差別都要重新再印過。之後佢哋仲會還原Van Gogh嘅其他作品，但只會限量生產。


除咗畫之外，海港城仲喺海運大廈正門長樓梯豎起咗一幅巨型嘅《向日葵》仿製品，有足足5米高，唔知係咪受到大黃鴨啟發，覺得大先夠吸引呢？