考局秘書長囡囡 放榜無壓力

【明報專訊】噚日喺文憑試放榜日子，負責睇住公開試嘅考評局秘書長唐創時當然緊張，原來佢喺女拔讀書嘅囡囡都係今年畢業，同其他同學仔一樣要迎接放榜。噚日Emily係女拔撞到唐同學，佢話嗲哋無陪佢一齊放榜，不過一樣多謝父母嘅支持，話佢哋畀好高嘅自由度佢，可以喺無乜壓力下學習。雖然佢唔肯講自己乜成績，但就話都好滿意咁話。


對於爸爸係考評局秘書長嘅身分，佢亦唔覺有太大壓力，強調自己「唔係叫唐創時個女，我就係我」。唐同學志願係做記者，而家諗緊去外地選讀有關科目。