生意淡泊 高盛大小通殺

【明報專訊】港股今年跑輸區內市場，連帶新股集資、配股呢啲「刁」都買少見少。生意淡泊，租用甲級商廈、出糧畀一班打工皇帝嘅投行可以點？高盛就示範佢哋能屈能伸嘅一面，大「刁」固然要搶，細「刁」亦唔放過，講緊嘅係文化中國傳播（1060）呢隻細價股配股，抽水區區2.68億銀，竟然搵到投行中至矜貴嘅高盛幫佢散貨，高盛仲唔係大雞食細米？


幫中傳播散貨收134萬 交租都唔夠

按行規，配售代理一般會收呢啲「刁」總金額嘅0.5%至1%作為佣金，細銀碼交易通常就收0.5%，換言之，搵高盛做呢單「刁」可能只係盛惠134萬！134萬銀對一般打工仔來講唔係細數目，但對高盛呢啲大行來講，可能一個中層職員坐緊果個位一年所交嘅租金，都唔止呢個數。


睇返今年，高盛其實都做咗幾單大「刁」，新股方面有銀河證券（6881）同埋中石化煉化（2386），配股方面仲威，年頭獨家食咗中石化（0386）成240億銀配售單「刁」，都咪話唔和味。不過大行即係大行，完咗嘅「刁」幾大單都好，面前永遠有數要跑，加上近排資本市場咁靜，當然要大小通殺啦。