網民製老虎機重組CY金句

【明報專訊】特首梁振英雖然講嘢有時比較沉悶，但係由特首選舉前至今，都可以話不乏金句，好似「記憶中，我無講過我無僭建」、「鄧小平應該拎諾貝爾和平獎」等令人O嘴嘅言論，有網民就發揮創意，喺網上製作咗個「梁振英對話產生器」，將佢嘅說話隨機重新組合，令說話變得更搞笑。


呢個小遊戲好似拉老虎機咁，有三格唔同組合嘅字，第一格多數都係，梁振英強調、梁振英說之類嘅主語；中間有「不承認」、「開誠布公地表示」、「印象中沒有說過」等；最後一格就有「要出動防暴隊對付示威者」、「自己是共產黨員」之類同與梁振英有關嘅句語。


玩家只要撳一下喺「老虎機」上面嘅拉軸，對話就會「自動生成」，Emily試過玩，就得出「梁振英宣稱印象中沒有說過應該拿諾貝爾和平獎」、「梁振英認為他曾說過自己是共產黨員」等字句。網站強調，呢啲只係作娛樂、學術同搞笑用途，唔代表梁振英曾經講過有關對話。


讀者如果有興趣玩，都可去到呢個網站：http://slot.miario.com/machines/61087