社民連學員挑機 葉劉：歡迎唔同政見

【明報專訊】Emily噚日講過，新民黨主席葉劉淑儀前日請一班喺該黨做實習嘅同學仔食飯，但遇到屬於社民連嘅學員，搞到佢嬲嬲哋，葉太噚日話，雖然嗰個學員有啲偏激，喺飯局上大家爭拗咗好耐，但葉太強調絕對歡迎同唔同政見嘅年輕人溝通、交流，包括向佢挑機嘅蔡同學。


葉太話，佢覺得蔡同學比較偏激，受民主派洗腦，但既然對方追求民主、自由，咁點解連點用錢都要管、都要問，唔畀其他人有自由？當日亦絕對唔係因為畀個學生激親而唔同班學生影相，只係要趕返立法會開會先至無時間。


稱對方偏激畀民主派洗腦

葉太話，新民黨一年收咗20幾個實習生，當然唔會篩選佢哋嘅政見、要「志同道合」先可以嚟，絕對歡迎任何人咁講。