倪匡大方：小孩遊戲

【明報專訊】今年書展有衛斯理50周年展，倪匡噚日同海外傳媒食飯，全程笑笑用普通話大談作品中角色人物，佢話發現網上唔少人將「衛斯理」嘅故事寫成黃色小說，不過佢一啲都唔嬲，覺得係「小孩子的遊戲」，所以無所謂。佢仲發現唔少網民冒名仿照，創作「衛斯理」故事，但佢覺得「好可惜」，因為呢啲人文采都好好，應該可以用自己個名發揮所長。


讚網民模仿創作好文采

寫小說無數嘅倪匡，多年來創造咗唔少經典人物，有上海粉絲幫佢出咗本關於衛斯理人物關係嘅書，倪匡笑笑口話，自己都搞唔清楚啲人物關係，「看到我頭都大了」，仲大爆寫小說時都無諗得咁多，有需要就寫多一個人，就連自己出過幾多本書都無印象。


輸入法寫書多蝦碌

倪匡自嘲後期出版嘅20幾本小說，都用「古怪」嘅聲控輸入法寫書，出現咗好多蝦碌，曾經試過普通話發音唔準，令電腦將「什麼東西」聽成「黨主席」！佢仲話輸入法可以儲存以往輸入過嘅句子，因為貪方便，所以讀者會發現後期出版嘅書入面出現好多重複嘅句子。