解拆蜜糖 《選擇》加印明推

【明報專訊】今期《選擇》月刊踢爆蜜糖有抗生素同埋致癌農藥，連貴價麥蘆卡（Manuka）蜜糖都唔例外，有仲攙雜人工蜜糖，呢個驚人發現嚇親唔少人，大家爭相買《選擇》睇清楚，搞到原本印兩萬本《選擇》，幾日內已經賣晒，家陣要急急加印3000本，聽日（周四）會有售。

今次都唔係《選擇》第一次賣斷市喇，舊年講強積金期都畀人搶購一空。至於呢期《選擇》咁好賣，全因唔少人會食麥蘆卡蜜糖希望調理個胃，聽到消委會話呢隻蜜糖都有出事，當然好緊張啦。今期《選擇》上個禮拜推出，幾日就賣晒，好多買唔到市民仲打去消委會查詢。

消委會今次亦都有書展擺檔，唔少市民又係買今期《選擇》，消委會見咁多人買唔到，就叫市民做長期訂戶，點知就咁吸引成千人訂呀！