傳張曉明飯局完飛北京

【明報專訊】上個禮拜二中聯辦主任張曉明去立法會食飯，Emily聽聞，張主任食完飯後就飛去北京。有建制派中人話，張曉明去北京有幾奇啫，職責所在，中聯辦主任當然不時去北京啦，例如參加港澳小組會議、或者向上頭匯報香港情况等，又話以前彭清華主任一個月都要去幾次北京，叫Emily唔使大驚小怪。


中聯辦諗緊點回請

嗰餐飯後，中聯辦都煩緊點樣回請議員。工聯會黃國健話，問過中聯辦副主任王志文，對方話會回請，但正考慮緊地點時間，王志文同黃國健講，如果唔喺中聯辦搞，佢又唔係好想就咁去酒店、酒樓，黃國健都同意，仲話其實部分泛民唔介意入中聯辦，尤其有好奇心嘅，但佢善意提過中聯辦，最好過咗暑假先，因為唔少議員已放大假唔喺香港。


另一議員謝偉俊就認為，上次張曉明嚟立法會食飯有破冰味道，但認為就溝通之言，其實日後見面最好係informal（非正式），甚至小圍咁搞會面，咁樣先傾到偈喎，若喺咁嘅環境，佢就認為中聯辦未必係好地點喇。