民主黨議員辦開幕

【明報專訊】民主黨葵青區議員林立志（Eric）議員辦事處噚日開幕，Emily本來諗住區議員都係嘉賓致辭、做儀式而已，點知嘉賓之一、葵青民政事務專員（DO）羅應祺致辭時，就嚇咗Emily一跳，原來做官都可以講得咁「自由」。


羅應祺：雙方堅持 解決唔到問題

羅專員話朝早見烏雲蓋頂，諗緊噚日戶外開幕禮仲搞唔搞得成，但佢話今年七一都橫風橫雨，但慶回歸活動同遊行照搞，所以議辦開幕禮一定風雨不改。佢又話，自Eric喺2011年做咗區議員後，自己壓力大咗好多，皆因對方睇晒文件先開會，讚佢問題精闢；而區議會之前討論反對佔領中環議案時，Eric讀咗黑人民權領袖馬丁路德金名言，所以DO噚日反贈言Eric，話緬甸反對派領袖昂山素姬都叫人要學習妥協，叫佢都可以參考一下，若雙方堅持，永遠都解決唔到問題。


前立法會議員張文光都有去主禮，佢仲送咗件墨寶「成功在久 立志在堅」畀Eric，因為Eric一直都恨攞到已故支聯會前主席司徒華（華叔）墨寶，可惜2007年佢區選輸咗，4年後贏到，華叔已作古，所以就由佢徒弟「張文」寫。