大球場變復耕地

【明報專訊】Emily勢估唔到，令英超球隊曼聯訪港搞到滿城風雨嘅唔係隊波，而係個場！香港大球場呢塊草地飽受風雨後變到成塊爛泥地咁，一眾網民當然把握機會改圖惡搞一番，Emily最欣賞呢幅「東北復耕圖」，當中有一隻牛，有一個大叔用泥耙喺大球場上面耕田（圖），可以話係「無縫接合」盞鬼非常。有網民講笑話，不如東北農民就搬去大球場復耕啦，不過Emily就覺得陳局長都可以考慮買起大球場同子孫「種吓嘢、度吓假」，唔使走到東北咁遠嘛！


講番曼聯，噚日Emily去咗星光大道嘅曼聯歡迎會，「曼粉」林健鋒亦代表盛事基金到場歡迎曼聯。林健鋒致辭嘅時候含情脈脈咁對住企喺旁邊嘅曼聯球員講，「我每晚都夢見你哋，每周六都喺電視睇你哋，家你哋終於嚟，希望你哋以後每年都嚟」，鬼咁肉麻，聽到Emily毛管都豎起晒。