曼聯名宿卜比賴帳

【明報專訊】近日英超冠軍曼聯來港，唔係個個都撲到飛噚晚入場睇波，Emily就只可睇電視。不過一班參加咗「賽馬會青少年足球精英訓練營」嘅年輕球員就非常幸運，因曼聯1960年代名宿卜比查爾頓（Bobby Charlton）、前球員科東尼同艾雲，噚日帶埋英超冠軍獎盃去咗訓練營探班。


卜比查爾頓當年話晒都幫英格蘭贏過唯一一次、1966年世界盃冠軍，過咗咁多年都仲係「寶刀未老」，噚日佢就教班13歲或以下學員射12碼、窩利抽射、心口控定後窩利抽射，同埋左腳抽射。佢又話，如果有球員射入12碼，自己就會做10下掌上壓。點知有人真係射入，Emily就梗係以為卜比查爾頓會做掌上壓啦，點知佢話「我返酒店先做」，令成班人捧腹大笑！