畀球迷狂噓 林健鋒理解

【明報專訊】曼聯對傑志嘅足球賽曲終人散，呢場波因為大球場草地差劣，成為城中話題。商務及經濟發展局長蘇錦樑同盛事基金評審委員會主席林健鋒（Jeffrey），前晚任球場頒獎嘉賓時被球迷噓爆，官員被噓正常，不過連Jeffrey都受罪，就有啲無奈同無辜，因為佢都明白球迷係唔滿意草地質素，所以乘機將不滿發泄喺佢哋身上。


Jeffrey前晚任主禮嘉賓，原因盛事基金資助咗800萬元搞呢場波。經過今次事件後，佢哋仲會唔會贊助足球賽呢？


叫政府建全天候大球場

Jeffrey就話，好難講清楚會贊助邊一項文化或體育活動，因為佢哋係逐項申請審批，有人嚟申請，委員會就睇吓活動係咪符合要求，例如係咪做到推廣香港形象及經濟等。


經過呢次風波，林健鋒就話政府真係要諗吓建一個適合全天候使用嘅大球場，否則將來想邀請外隊來港作賽，或者搞演唱會等表演，都要繼續面對場地問題。