《 明報》奪3消費權益新聞獎

【明報專訊】一年一度嘅「消費權益新聞報道獎」噚日揭盅，新聞組同特寫組兩個文字媒體總共10個獎中，《明報》奪得3獎，其中包括同事搵埋立法會議員一齊放蛇報道嘅「黑的士」新聞，得到新聞組銀獎。


由消委會、記協及攝影記者協會合辦嘅第13屆消費權益新聞報道獎噚日頒獎，《明報》攞咗3獎，其中「廣東道7截的士 3遇黑的」獲得新聞組銀獎，呢個報道係同事林耀華、陸文及衛永康，假扮內地遊客去滿街名店嘅廣東道「放蛇」，揭露「黑的士」嘅嚴重程度，有一次放蛇仲搵埋立法會議員葛珮帆幫手，結果將黑的問題帶上立法會，之後幾個月警方多次高調執法，有效打擊黑的士，包括噚日警方再派本地同外籍警員放蛇，拉咗3個涉嫌濫收車費嘅的士司機。


除咗黑的士報道，由港聞版同事冼韻姬、錢瑋琪同前同事黎嘉愉做嘅「美容院高薪挖公院新醫生」，攞到新聞組優異獎；兩個前同事陳家俊同吳光熙，亦憑「智能陷阱」系列奪得特寫組優異獎。Emily喺度恭喜咁多位同事！