怕阻人生意 CY今請客轉場

【明報專訊】特首梁振英（CY）今晚會宴請20幾個政黨成員同學者，本來呢啲飯局正常不過，只係Emily得悉，宴會地點由香港會改為去禮賓府，政府就話費事阻住人哋做生意，不過，有份去食飯嘅人就講笑咁講，餐飯「揚晒」，門口肯定好多人追訪，CY隨時連香港會門口都入唔到，Emily諗吓又覺得幾啱喎！

真普聯成員 政制局長同場

CY今晚嗰餐飯，嘉賓有26人，包括中央政策組前首席顧問劉兆佳，基本法委員會委員劉迺強，3名真普選聯盟學者團成員葉健民、盧兆興同李芝蘭，連同CY、政制局正副局長，合共29人（見表）。


張文光：會叫CY組織唔同黨派

有份去嘅民主黨黨員張文光話，佢會叫CY認真組織唔同黨派組成平台，蒐集公眾對2017年特首普選意見。佢又話，真正普選方案要有民意授權，好似經過民意調查，而唔係政黨自己協商。


張文光透露本來黨友李永達都去，不過話民主黨有佢同羅致光去，李永達就唔去喎。