林奮強圖掀「無色革命」

【明報專訊】前行會成員林奮強兩周前出席由恒隆集團主席陳啟宗搭台搞嘅香港發展論壇，正當大家諗住佢係為復出政壇熱身，點知佢踏正8月1號就請辭行會成員，真係世事難料。不過，人生無絕路，「梁粉」嘅舞台唔止一個，噚日，有人形容係「梁粉文宣部」嘅「港人港地」就上載咗兩段林奮強專訪。


走以知識改變世界的路

林奮強雖然喺行會嘅時間短，但唔少行會成員都對呢位有份創辦「香港黃金五十」嘅成員滔滔不絕嘅印象深刻。喺專訪中，林奮強主要繼續宣揚佢嘅「黃金概念」，重點只有一個，就係「剛放下行政會議公職」嘅佢，未來會點「選擇更專注」走一條以知識改變世界嘅路。


要做研究搵數據

不過，呢位剛辭任行會職務嘅「黃金戰士」，未來可能要脫色喇，事關佢打算用無政治色彩、無顏色嘅數據改變世界，話要掀起一場「無色革命」咁。佢話，要做研究搵數據，用道理說服公眾，希望社會用佢嘅無顏色知識，共議改革社會嘅政策。睇嚟，佢仍然想做服務社會嘅事情。


Emily打聽過，呢個專訪喺佢辭職前已做好，下星期仲會有埋第三部分