見完一行禪師 陳維安轉食齋

【明報專訊】立法會秘書長陳維安（Kenneth）係天主教徒，但多年嚟都會去一行禪師嘅禪修營。唔知係咪聽咗禪師呼籲茹素，加上營內要食齋，佢今年5月出營後，突然決定開始食齋，仲話至今感覺舒服。不過，佢仍會食蛋同飲奶，咁就可以繼續飲佢嘅至愛——「咖啡」！


繼續歎啡 未有減磅

Kenneth噚日接受網台節目《議會內外》訪問，話老婆家都無食牛肉，但兩個仔暫時就未加入。佢透露體重未有明顯減少；同樣茹素嘅立法會議員葛珮帆同佢講要食半年先至有改變。


講番立法會，Kenneth剛就任秘書長1年，話呢年多咗搞公聽會，新大樓服務時間長咗，加上早前預算案辯論拉布，至今仲有100萬隻字嘅會議文件未做好翻譯，所以會向政府要求增撥資源，處理議會工作同埋將手語、普通話傳譯擴展至所有委員會。


卿姐話立會秘書太細聲

Kenneth又話佢有信心，同事有足夠經驗，可以處理到未來一年包括政改等可能喺立法會出現嘅衝突場面，避免發生周日旺角混亂情况。節目主持、民主黨主席劉慧卿就話議會嘅秘書「陰聲細氣」，希望將來請啲大聲啲嘅秘書。雖然Emily唔知佢嘅標準，但係要搵個比卿姐講得大聲嘅人都唔易㗎。