吳天海叫人抄有線

【明報專訊】近期本港傳媒界有新氣象，亞視進入新老闆年代，不過新任大股東黃炳均尚未露面，唔知會有咩新搞作。收費電視方面，有線寬頻（1097）闖出新血路，開拓咗24小時中文娛樂新聞頻道，主席兼行政總裁吳天海噚日話，歡迎有意搞娛樂台嘅競爭對手嚟抄橋。

唔經唔覺，娛樂台已經啟播超過7年，吳主席出席有線娛樂台宣傳活動時話：「以前有人跟我說想搞一條全娛樂新聞頻道，會否很難？我會跟他說『想也不要想』；但現在有人問我說同一個問題，我會說『想也不用想，很容易，照抄CEN（娛樂台）就可以了』。」吳主席真係厲害，唔驚人抄橋，仲擺明姿態「放馬過嚟」，佢對自家製作真係好有信心。

邀得多位歌手上節目

早排亞視投訴無綫壟斷，包括限制某些藝人出鏡，廣管局上個禮拜話，會正式調查。有線娛樂台就率先打破壟斷局面，同歌手合作節目，包括莫文蔚、謝安琪、薛凱琪、關楚耀及周柏豪等，仲話遲啲會有更多歌手加入。娛樂圈新局面，睇嚟一台獨大嘅情况會逐步改善。

報料電郵﹕piano@mingpao.com