黃炳均缺席昌興股東會

【明報專訊】大家估唔估到，究竟左邊相中呢位身形略胖、表情敦厚嘅兄台乃何許人士？相信畀10次機會，大家都未必估得中，無謂浪費時間，開估！相中人正是亞視當今大股東兼上市公司昌興（0803）嘅主席黃炳均，或者小琴以「王征親戚」去形容佢會比較適合，事關廣管局當日批准佢入主亞視，翌日一眾傳媒仍然係以「王征親戚」做題。

點解小琴對人哋嘅親戚印象咁深刻，無他，噚日撞啱昌興開股東周年大會，小琴諗住終於可以去會一會「炳均」，所以事先「刨」熟「炳均」嘅樣，以免認錯人尷尬就唔好啦！誰不知小琴山長水遠去到尖沙嘴諗住可以同「炳均」傾下偈，了解吓佢點樣以「王征親戚」嘅身分去延續王征嘅亞洲CNN夢嘅時候，居然要「食檸檬」，公關話主席出咗埠，即使喺度亦都唔會回應私人投資嘅問題，令到追開亞視新劇《勝者為王》、支持「有heart」製作嘅小琴好失望囉！

查實小琴唔止一次「食檸檬」，幾個月前，亞視向廣管局申請黃炳均加入做股東。小琴已經去過辦公室拜訪佢，但同「炳均」緣慳一面。

公關：喺度都唔回應私人投資

之後昌興國際開過股東特別大會，「炳均」都係冇現身，令到一眾傳媒「摸門釘」。今次「炳均」正式成為亞視大股東，都仲要做神秘人，未肯出嚟見大家。

亞視資深員工 未見過新老闆

據亞視嘅資深員工話，廣管局9月10日公布，接受呢位新任大股東加入亞視後，佢哋都未見過「炳均」。「炳均」收得咁埋，唔知係咪度緊傳媒大計。其實大家都係想問吓佢，點樣搞好亞視，為觀眾提供好節目，希望佢快啲出嚟見見廣大群眾。

報料電郵﹕piano@mingpao.com