一哥首去區會 頻頻謝議員支持

【明報專訊】警務處長盧偉聰（一哥）上任後，噚日首次出席區議會會議，一哥喺屯門區議會逗留咗兩個鐘，逐一回應17個議員嘅發言。一哥表現得非常客氣，頻頻多謝議員支持，仲強調警民合作，又叫市民幫手留意吓身邊嘅罪案，歡迎向警方提供資料，佢哋一定會跟進。


同場有議員質疑警隊政治唔中立，一哥苦口婆心地希望市民能體諒警方，「我不斷同市民解釋，希望佢哋信警隊冇私心、冇政治取態，同警隊合作，我哋先可以畀到一個安全嘅生活環境大家」。


佢喺會後又回應警隊網頁刪改部分對六七暴動描述嘅字句，一哥解釋只係精簡網頁，並無政治目的。


網民提醒「唔好隨便精簡」

一哥嘅精簡論迅即成為網民熱話，有網民提醒一哥「唔好隨便精簡」，如果精簡「中華人民共和國」，就可能會變成「中華民國」，完全係另一回事。