美酒佳餚巡禮回歸中環 展商美食增 有威士忌手工啤

【明報專訊】香港旅發局忙個不停，除咗即將要首辦單車賽外，10月22至25日又要搞一年一度嘅香港美酒佳餚巡禮。Emily聽聞，今年美酒佳餚嘅規模會創紀錄，不單參展商大增，現場提供嘅美食都會增加，會有阿一鮑魚，又會有米芝蓮廚師由法國飛嚟香港為大家一展手藝，相信大家可以飲飽食醉喇。除咗紅酒、白酒、清酒，今年仲有流行嘅威士忌及手工啤酒，果然緊貼市場變化。今年入場費仍然係30蚊，品酒證嘅套票則由200蚊到1000蚊不等。


去年因為佔領行動，令美酒佳餚巡禮由中環改到啟德遊輪碼頭舉行，今年可以回歸中環，旅發局都鬆一口氣，因為交通問題實在係一大挑戰。


冬日節聖誕樹將有新意

除咗美酒佳餚，旅發局年尾仲要搞香港繽紛冬日節，去年佢哋喺中環皇后像廣場聖誕樹搞咗個噱頭——邀請各地愛侶掛起「愛情鎖」，但當日反應一般。今年局方話會從聖誕樹入手，搞搞新意思，但究竟聖誕樹仲可以有咩新意？要等佢哋揭曉嘞。