新興遊台東種米種菠蘿

【明報專訊】一有長假放，Emily同好多港人一樣都鍾意去吓台灣，貪近近哋，物價比香港平，又多好嘢食。以前香港人鍾意去台北、台南或者台中，但原來新興玩法係返璞歸真，去台東種米種菠蘿，種落咗仲有個名牌，唔驚畀人攞走！


fb放遊客所種植物情况

台灣觀光局噚日搞台灣農莊花果美食節，觀光局香港辦事處主任巫宗霖話上年港澳赴台遊客超過137萬人次，今年淨係頭8個月已經有近100萬人次，比上年同期增加6.3%，佢好有信心可以達到今年目標150萬人次。


Emily諗住同巫生取吓台灣遊玩經，佢話家好多香港人專登去台東玩，種吓稻米、菠蘿。Emily擔心種咗會畀人偷走或者撈亂，巫宗霖話會有個名牌仔插喺稻米前面，而菠蘿就可以用特別嘅筆寫自己個名喺塊葉度。農場工作人員仲會將遊客親手種嘅植物生長情况擺上facebook，咁遊客到時到候就可以返去收成！唔知係咪香港無地方可以種嘢，所以大家都走去台灣種呢？


巫生話6月至8月，香港直飛台東嘅航班有19架次，來回有38個航班，全部都坐滿，全部都係香港人，未來希望再擴大活動種類，唔止種米同菠蘿！