蒙面「廿蚊張」亮相《頭條》

【明報專訊】歌手李克勤、梁詠琪參加內地節目《蒙面歌王》引起唔少討論，港台節目《頭條新聞》今晚回歸，首集亦有帶住20蚊面具嘅蒙面議員，仲喺節目度獻唱許冠傑經典歌曲《半斤八兩》，雖然睇相都未必認到，但相信聰明嘅讀者都應該估到，同20蚊最大關係嘅，係當年最低工資被稱為「20蚊張」嘅自由黨飲食界立法會議員張宇人（Tommy）喇，唔知佢唱呢首歌，係想講打工仔心聲，定係老闆名言呢？

料明年4月現酒樓結業潮

Tommy向來關注業界市道，佢同Emily講，其實酒樓都幾大鑊，即使中秋節臨近，但佢聽聞訂枱食飯情况都唔理想，估計明年4月就會出現酒樓結業潮，佢仲話，因為年尾通常酒樓都係旺市，比較多做節、婚宴擺酒等，相信都仲可以捱到一陣，但去到旺季結束，影響就會陸續浮現。不過，Tommy話酒樓結業，未必會令大批人失業，因為目前周圍都請唔到人，即使酒樓結業，影響未必太大。


作為業界代表，Tommy都好為業界着想，9月底生日嘅佢話，之前朋友同佢食生日飯，佢都會食西餐，但為咗撐吓業界，佢噚晚就選擇咗去旺角一間中式食肆打邊爐慶祝。