明年嶺大新生必修社會服務

【明報專訊】嶺南大學噚日同傳媒茶敘，新上任嘅嶺大副校長莫家豪透露，由2016至2017年度起入學嘅學生，需要修讀至少一個有服務研修嘅學科，即係同學要做一啲與學科相關嘅社會服務，唔限於學生本科，希望佢哋走出課室學以致用。


嶺大有比較多人文學科，例如歷史、中文等等，Emily就好奇到底學生會做啲乜嘢社會服務呢？歷史系副教授劉智鵬就話，歷史系學生可以為社會記錄口述歷史，今年就有一班學生去接觸洪水橋一個村莊嘅老人家，幫佢哋寫低24個人生故事，準備下年結集成書。中文系副教授司徒秀英就話，曾經帶領學生同社區中心嘅長者交流中國戲曲同文學嘅知識。


晉身《福布斯》亞洲十大博雅學院

今年嶺大獲美國雜誌《福布斯》評為2015年亞洲十大頂尖博雅學院之一，莫家豪認為大學除咗追求學術研究之外，唔能夠忽略博雅教育，希望學生明白知識轉移同關懷社會嘅重要。