有話說﹕化解子女困擾 父母最重要

【明報專訊】啱啱又有學童因未能適應新開學而自殺的新聞，已經係開學以來第二宗，睇到Happy MaMa好心痛。


四成學生怕開學

成年人返新工都要時間去適應，更何况係小朋友面對新學校、新老師和同學，仲要應付接踵而來的功課及考試壓力？香港青年協會「關心一線27778899」剛剛公布一項調查，指有份填寫問卷的3950名中小學生中，近四成受訪者面對新學期有負面情緒，分別有14.3%感到「有壓力」、13.1%感到「不安」、12.2%感到「擔心」，數字都幾令人憂慮。


尖子也會有壓力

Happy Mama同青協督導主任徐小曼傾過，她提到無論是小學、中學甚至剛升上大專的青少年，都有機會對新環境不習慣，試過有尖子入到大學，先發現身邊同學比自己叻，立刻覺得自己被比下去，又唔知點同人講呢種感受。徐小曼話﹕「學生經歷完暑假，突然又要面對學業，對他們來說衝擊十分大，不過踏入10月，這種困擾多會平復過來。不過在考試前，或者考試後遇到成績未如理想，他們又有機會出現焦慮和壓力。」她認為當青少年遇到情緒困擾，父母的角色就更加重要，因為家長始終最了解自己嘅仔女，而且係接觸佢哋最多的人，最重要係令青少年知道，無論出面有幾多壓力，家庭永遠都係自己最信得過、最能找到安慰的地方；而當同仔女發生衝突時，父母更加要留意佢哋情緒變化，唔好等佢哋諗歪。Happy Mama非常同意徐小曼的講法，希望呢啲悲劇唔好再發生喺任何一個家庭身上。