葉家寶出三部曲 爆亞視出糧故事

【明報專訊】亞視執行董事葉家寶為咗亞視拖糧，將喺星期五（10月2日）上庭，用亞視嘅經典口號話齋，佢為咗呢單case，真係「迎難而上」，佢噚日開始喺blog寫「迎難而上」三部曲，第一集就大爆背後嘅一段古。


根據葉家寶最新blog文，原來家寶早就有伯樂賞識，可以另謀高就，但佢話自己不忍喺亞視最需要佢嘅時候走咗去，先至接受投資者王征同股東黃炳均建議，喺2014年2月起做執董，負責日常行政營運，而股東同投資者注資就由當時嘅財務部副總裁李錫勛，同代表黃炳均嘅董事兼高級副總裁欒振國負責。


傾股權轉讓 條件要新買家出糧

家寶仲話，舊年9月底見資金未到位，就催李、欒兩人，又主動搵王征同黃炳均，當時王征畀佢嘅信息，係傾緊股權轉讓，其中一個條件就係新買家要出糧。


家寶又講番上次2009年股權變動時，以佢了解，當時嘅新投資者王征，未簽正式合同已畀錢出糧。佢點都無諗到最後搞到咁複雜，幫同事追薪之餘，自己亦被拖糧，結果仲要揹官非。