范太質疑「名譽資深大律師」 任建峰﹕咩係常委？係咪常毁？

【明報專訊】唔畀做香港大學副校長嘅陳文敏，係全港唯一一個「名譽資深大律師」，不過，全國人大常委范徐麗泰日前就質疑「名譽資深大律師係咩嚟㗎？」「法政匯思」召集人任建峰噚日反擊范太，喺電台節目上反諷話﹕「人大常委係咩嚟㗎？係咪個人好大、經常毁壞，就叫『全國人大常毁』？」

任建峰噚日接受商台《在晴朗的一天出發》電話訪問，回應陳文敏事件。任建峰話名譽資深大律師只係頒發畀研究、學術成就「超然」嘅學者，頒發時已經考慮到佢嘅學術成就，「如果唔係學術成就（超然），根本唔會頒名譽資深大律師」。


至於校委會成員廖長江被引述喺會上批評陳文敏學術水平不足，指過去5年其學術文章喺Google Scholar僅被引用4次，任建峰就反駁話，Google Scholar對學者而言係「零重要性」。