食品公司古法洗樓派傳單請人

【明報專訊】近年搵工都興喺網上搞掂㗎啦，但Emily最近發現有食品公司回到基本步，上樓逐家逐戶派傳單，搵人返工都咁刻苦！Emily向呢間公司了解吓，原來係一間位於大埔區、叫做「健康飲食集團」嘅公司，專為附近學校提供膳食，最近大量招聘兼職同全職，例如有包裝員、文員、駐校派飯員等。


負責人話工作愈粗重，份糧都愈有分量，有啲工種仲可以有55元一粒鐘，提供埋膳食，仲話有年終花紅。不過，由於返工時間比較麻煩，主要係平日上午至中午嘅時段缺人，所以負責人就話試吓派街招畀同區街坊，希望吸引多啲主婦嚟見工。佢哋印咗成2萬幾張傳單搵人去派，而Emily見到佢哋喺公屋「洗樓」，仲勤力過啲區議員，每層樓每個單位鐵閘都放咗傳單，估唔到洗咗一星期樓就見效，55元時薪嘅職位一下子就請到人，所以真係橋唔怕舊，最緊要受。


香港食品及飲品行業總會主席黃家和就話，有時食品公司為咗請番當區嘅人，就會用呢個咁土炮嘅方法，而且如果目標想請主婦，就更加要用呢個傳統方式。雖然有公司咁積極請人，但黃家和就對未來嘅經濟環境唔係咁樂觀，估計人手需求慢慢會無咁緊張喇。