阿松盼社會勿再鬥爭 講明唔提港大

【明報專訊】前財政司長梁錦松（阿松）噚日以「惜食堂」主席身分，出席機構主辦嘅校際罐頭設計比賽嘅作品展開幕禮，呢個位於商場嘅作品展，展出過千個由中小學同幼稚園學生設計嘅罐頭，另外有30幾罐由政商界人物同藝員設計，多個現任司局長包括林鄭月娥同曾俊華都有份參與，但特首梁振英就無份。「惜食堂」係咩機構？就係早前藝人黃子華為機構拍咗段呼籲捐款片，講有長者為咗一個免費飯餐而要撐樓梯上落9層樓，引起熱烈迴響嘅慈善組織。


名人設計罐頭 為惜食堂籌款

梁錦松喺台上發言嘅時候，形容社會近年出現唔少政治上嘅分化對立，希望社會唔好再鬥爭，又話希望透過活動建造一個和諧包容嘅城市。身為港大校友嘅梁錦松或者知道母校任命副校長一事敏感，活動開始前公關已經話佢唔會回應相關問題，最終梁錦松活動前後都無回應記者其他提問。


講番個活動，30幾罐由名人設計嘅「名人膳心罐」，會被「惜食堂」擺喺網上拍賣，籌得款項會全數撥捐到機構嘅食物回收同援助計劃，幫助有需要嘅人。